Կոպենհագենյան հավաքը վերջապես ավարտվեց. մասնակիցներն արդյունքներից դժգոհ են

Կոպենհագենում հինգ պետություններ համաձայնության են եկել գլոբալ տաքացման դեմ պայքարի շուրջ։ Դրանց թվում են այն երկրները, որոնք բոլորից շատ են աղտոտում մթնոլորտը՝ Միացյալ Նահանգները և Չինաստանը, ինչպես նաև Բրազիլիան, Հարավային Աֆրիկան և Հնդկաստանը։ Ձեռքբերված համաձայնագիրը իրավական ուժ չունի, և ըստ էության, հռչակագիր է մտադրությունների մասին։ Այդ մասին հաղորդում է AP գործակալությունը։

ՄԱԿ-ի գագաթաժողովում, որին մասնակցել են 194 պետությունների ներկայացուցիչներ, որոշվել է երկրագնդի միջին տարեկան ջերմաստիճանը պահպանել Ցելսիուսի սանդղակով +2 աստիճանի վրա։

Առաջիկա երեք տարիների ընթացքում գագաթաժողովի մասնակից երկրները մտադիր են մոտավորապես 30 մլրդ դոլար հատկացնել զարգացող երկրներում գլոբալ տաքացման դեմ պայքարին։ Այդ գումարից մոտ 3,6 մլրդ դոլարը հատկացվելու է ԱՄՆ-ի, 11 մլրդ–ը՝ Ճապոնիայի, և 10,6 մլրդ–ը՝ Եվրամիության բյուջեներից։

Նշենք նաև, որ Եվրամիության երկրները մինչև այժմ հավանության չեն արժանացրել համաձայնագիրը և հետաձգել են մամուլի ասուլիսը, որի ընթացքում պետք է խոսեին հավաքի արդյունքների մասին։ Կոպենհագենից արդեն մեկնել են Դմիտրի Մեդվեդևը, Բարաք Օբաման և Ուեն Ցզյաբաոն։

Միացյալ Նահանգների նախագահի խոսքով՝ ընդունված որոշումը «աննախադեպ» է, սակայն չի ներառում գլոբալ տաքացման դեմ պայքարի բոլոր անհրաժեշտ միջոցառումները։ Ֆրանսիայի նախագահ Նիկոլա Սարկոզին, իր հերթին, նշել է, որ համաձայնագիրը «կատարյալ չէ, սակայն մինչև հիմա ընդունվածներից լավագույնն է»։ Կլիմայի վերաբերյալ հաջորդ գագաթաժողովը տեղի կունենա կես տարի անց Գերմանիայում։